GitHub-yň baş direktory Tomas Domke tas dört ýyl işläninden soň wezipeden gidýändigini mälim etdi. The Verge-iň habar bermegine görä, ol Microsoft-yň we GitHub-yň çäginden daşary täze taslamalar bilen meşgullanmak üçin wezipäni terk edýär.
Indi Microsoft baş direktor wezipesini ýatyryp we topary gönüden-göni özüniň CoreAI EA bölümçesiniň garamagyna geçirip, platformanyň dolandyryş gurluşyny üýtgeder.
Domke kompaniýanyň bökdençsiz geçişini üpjün etmek üçin 2025-nji ýylyň ahyryna çenli galýandygyny aýtdy.
GitHub 2018-nji ýylda Microsoft tarapyndan 7,5 mlrd dollara satyn alyndy we häzir çenli garaşsyz kompaniýa hökmünde işledi. Domkeniň gitmegi platformanyň Microsoft ekoulgamynda täze tapgyryny alamatlandyrýar. Indi GitHub-yň ýolbaşçylygy Meta-nyň öňki top-menejeri Jeý Parikhiň baştutanlygyndaky CoreAI kompaniýasynyň öňünde hasabat berer.
CoreAI içerki we müşderi taslamalary üçin emeli aňa esaslanýan platformalary we gurallary birleşdirýän Microsoft-yň inženerlik bölümçesidir. Parikh ony geljekki “EA agentleriniň fabrikasy” diýip atlandyrdy. Geçen hepde GitHub Copilot-yň we beýleki EA taslamalarynyň ösüş mümkinçiliklerini ara alyp maslahatlaşan Domke öz startapyny döredip, bu ugurda Microsoft-yň täze bäsdeşi bolup biler.
