Aýdymçy Teýlor Swift özüniň ilkinji doly metražly filmini surata düşürmäge taýýarlanýar. Ilkibaşda meýilleşdirilişine görä, filmiň edebi esasyny onuň özi ýazmalydy, ýöne indi bu wezipe meşhur "Mirasdüşerler" serialy boýunça tanalýan tejribeli ssenariçi Elis Býorçe tabşyryldy.
Coming Soon neşiriniň berýän habaryna görä, Býorç edebi esasy Swift döredijilik hyýalyna laýyklaşdyrmak üçin onuň bilen ýakyndan işleşer.
Aýdymçynyň film döretmegi meýilleşdirýändigi 2022-nji ýylda belli boldy. 2020-nji ýyldan bäri Swift alty dürli albomyndaky aýdymlaryndan on aýdym-saz wideosyna özbaşdak režissýorlyk etdi. Olaryň arasynda "The Man ", "Fortnight" we beýleki aýdymlaryň wideolary bar. 2021-nji ýylda Sedi Sinkiň we Dilan O'Braýeniň baş keşbi janlandyrmagynda “All Too Well” atly gysga metražly filmi hem çykardy.
Elis Býorç “Mirasdüşerlerden” başga-da, Uilýam Oldroýdyň “Ledi Makbet” filminiň üstünde işledi. Şeýle hem, ol Salli Runiniň adybir romany esasynda döredilen “Sag adamlar” serialynyň edebi esasyny ýazdy. Salliniň döredijiligi, esasanam “Dostlar bilen söhbetdeşlik” romany Teýlor Swiftiň göwnünden turýar.
Býorçiň iň soňky işi, Jennifer Lourensiň we Robert Pattinsonyň baş keşbi janlandyrmagynda, Linn Remziniň “Die My Love” filminiň edebi esasy boldy. Film maý aýynda Kan film festiwalynda görkezilip, ýedi minutlyk el çarpyşmalar bilen garşylandy.
