Londonyň “Kristal Pelas” kluby Angliýanyň Superkubogy ugrundaky oýunda penalti tapgyrynda “Liwerpuly” utdy. Topar öz taryhynda we 2025-nji ýylda ikinji titulyny gazandy. Mundan öň klub finalda “Mançester Sitini” utup, Angliýanyň Kubogyny gazanypdy.
“Liwerpul” bilen duşuşyk “Uembli” stadionynda geçdi we esasy wagtda 2:2 hasabynda tamamlandy. “Liwerpul” täze oýunçylary Ýugo Ekitikeniň we Jeremi Frimpongyň gollary bilen iki gezek öňe çykdy. “Bürgütler” hasaby iki gezek deňledi – Žan Filipp Mateta we Ismaila Sarr gol geçirdi. Penalti tapgyrynda londonlylar 3:2 hasabynda utdy.
“Kristal Pelasyň” janköýerleri Ýewropanyň Futbol Assosiasiýalarynyň Birleşiginiň (UEFA) kluby eýeçilik gurluşy sebäpli konferensiýalar ligasyna geçirmek baradaky çözgüdine ýene nägilelik bildirdi. Münberlerde “UEFA – mafiýa” ýazgyly banner görkezildi. Ozal UEFA topary Ýewropa ligadan aýyrdy, klub bolsa Lozannadaky Sport arbitraž kazyýetine şikaýat arzasyny berdi. Kararyň 11-nji awgustda bolmagyna garaşylýar.
Superkubok, belli bolşy ýaly, Angliýada futbol möwsümini açýar we ýurduň çempiony bilen kubogyň eýesiniň arasynda oýnalýar. “Liwerpul” bu kubogyň 16 gezek eýesi boldy, ondan köp diňe “Arsenalda” (17) we “Mançester Ýunaýtedde” (21) bar.
“Kristal Pelas” “Arsenal”, “Çelsi”, “Tottenhem Hotspur” we “West Hem Ýunaýted” bilen bir hatarda Superkubogy utan bäşinji London kluby boldy.
