Ýewropa Futbol Assosiasiýalary Bileleşigi (UEFA) Londonyň “Kristal Pelas” klubuny onuň eýeçilik gurluşy bilen bagly bähbitleriň ters gelýändigi sebäpli, Ýewropa ligasyndan Konferensiýalar ligasyna düşürdi. Bu karar amerikaly telekeçi Jon Tekstoryň iňlis toparynda-da, Fransiýanyň “Lion” klubunda-da paýynyň bardygy bilen baglanyşykly kabul edildi.
UEFA-nyň maglumatlaryna görä, Tekstor hasabat döwründe “Lionyň” paýynyň 90%-ne we “Kristal Pelasyň” paýynyň 43%-ne gözegçilik edýärdi. Guramanyň düzgünnamalarynda hiç kimiň Ýewropa ýaryşlaryna gatnaşýan birden köp klubuň dolandyrylyşyna göni ýa-da gytaklaýyn gatnaşyp bilmejekdigi aýdyň görkezilýär. Klublara Maliýe Gözegçiligi Komissiýasy (CFCB) gapma-garşylygyň bardygyny ýüze çykardy we düzgüne laýyklykda milli ligada has ýokary orny eýelän toparyň – “Lion” Fransiýada bäşinji, “Kristal Pelas” bolsa Angliýada 12-nji ýerde - peýdasyna karar kabul etdi.
“Kristal Pelas” başda klubuň taryhynda ilkinji uly kubok bolan Angliýanyň Kubogynyň ýeňijisi hökmünde Ýewropa ligasyna gatnaşmaga hukuk gazanypdy. “Lion” Ýewropa möwsümine gatnaşyp bilmezlik töwekgelçiligi astyndady, sebäbi gözegçilik edarasy öň olary Liga 1-den çykarmak barada karar çykarypdy, ýöne bu karar şikaýat edildi.
The Guardian gazetiniň habaryna görä, Tekstoryň “Kristal Pelasdaky" paýyny NFL-iň “New-Ýork Jets” - klubunyň eýesi Wudi Jonsona satmak barada ylalaşyk gazanyldy.
Mundan başga-da, Tekstonyň özi “Kristal Pelasda” karar bermek hukugynyň ýokdugyny tassyklaýar. Telekeçi London klubunda "dolandyryş kararlaryny" kabul edip bilmejekdigini görkezýän resmi subutnamalarynyň bardygyny we UEFA-nyň "bu resminamany görendigini" aýtdy.
“Kristal Pelas” we “Lion” bilen baglanyşykly ýagdaý ýeke-täk däl. Mysal üçin, geçen möwsüm Çempionlar ligasynda “Mançester Siti” (100% City Football Group-a degişli) we “Žirona” (47%) şuňa meňzeş gapma-garşylyklar bilen ýüzbe-ýüz boldy. Şonda maýa goýujy Ispaniýanyň klubunyň düzüminde düýpli üýtgeşmeleriň bolandygyny aýdyp, UEFA-ny ynandyrmagy başarypdy.
