Instagram göni ýaýlymlar üçin täze çäklendirmeleri girizdi: indi açyk akkauntlary bolan ulanyjylar we azyndan 1000 abonenti bolanlar göni ýaýlymda çykyş edip biler. TechCrunch-iň habar bermegine görä, sosial ulgam üýtgeşmeleri resmi taýdan tassyklady.
Ondan öň Live-režim, abonentleriniň sanyna ýa-da akkauntynyň derejesine garamazdan, ähli ulanyjylar üçin elýeterlidi. Täze düzgünler şahsy profilleriň we uly bolmadyk akkauntlaryň eýeleri üçin ýaýlyma goýbermek mümkinçiligini aradan aýyrýar. Ulanyjylar ýaýlyma başlamaga synanyşanlarynda, olar munuň talaba laýyk däldigi baradaky habarnamany alýarlar.
"Biz mazmunyň hilini ýokarlandyrmak üçin, göni ýaýlymda hyzmat şertlerimizi täzeledik" – diýip, Instagram-yň wekilleri mälim etdiler.
Çäklendirmeler ulanyjylaryň arasynda, esasanam, az sanly tomaşaçy bilen aragatnaşyk saklamak üçin ýaýlym ulanýanlaryň arasynda nägilelik döretdi. Ulanyjylaryň köpüsi platformany öňki düzgünine getirmäge çagyrýarlar.
Bilermenler täze talaplaryň TikTok-daky bilen meňzeşdigini belleýärler, onda-da ýaýlymlar üçin azyndan 1000 abonentiň bolmagy talap edilýär. Deňeşdirmek üçin, YouTube-da ýaýlymlara başlamak üçin diňe 50 abonentiň bolmagy ýeterlik.
Instagram üýtgeşmeleri ýaýlymlaryň hilini ýokarlandyrmak üçin edilýän tagalla hökmünde düşündirýär, ýöne jikme-jiklikleri bermeýär. Seljerijiler munuň hem Meta-nyň çeşmeleriniň optimizasiýasy bilen baglanyşykly bolup biljekdigini çaklaýarlar, sebäbi az tomaşaçy bilen ýaýlymlary goldamak hyzmat çykdajylaryny talap edýär.
