ABŞ her bir arza beriji üçin 5 müň dollardan 15 müň dollara çenli möçberde girewine wiza bermegiň 12 aýlyk synag maksatnamasyny işe girizýär. Ol resminamalarynyň möhletini geçirýän syýahatçylar bilen göreşe gönükdirilendir diýlip, Döwlet departamentiniň federal sanawda hödürlenen resminamasynda aýdylýar.
Bellenilişi ýaly, bu çäre wiza režimini ýygy-ýygydan bozýan ýurtlardan B-1 (iş saparlary) we B-2 (syýahatçylyk) kategoriýalarynyň wizalary üçin ýüz tutýan adamlara degişli bolar. Şeýle ýurtlaryň sanawy getirilmeýär.
“Konsul işgärleri arzalary gözden geçirmegiň netijesine görä $5 000, $10 000 ýa-da $15 000 möçberde girew girizmegi talap edip biler” – diýlip, çözgütde aýdylýar. Şol bir wagtyň özünde eger daşary ýurtly raýat ABŞ-a girip, wizanyň şertlerini berjaý edip, öňünden kesgitlenen howa menzili arkaly howa ýoly bilen çyksa, pul yzyna gaýtarylar.
Maksatnama 2025-nji ýylyň 20-nji awgustyndan güýje girer we 2026-njy ýylyň awgustyna çenli dowam eder.
Şeýle-de, çözgüdiň tekstinde Döwlet departamentiniň synag maksatnamasynyň çäklerinde girew girizmeli boljak arza berijileriň sanyny heniz takyk kesgitläp bilmeýändigi, ýöne olaryň sanynyň 2 müň töweregi adama barabar bolup biljekdigi aýdylýar.
