Hindistanyň Karnataka ştatynyň Kolar etrabynyň 38 ýaşly ýaşaýjysynda gan toparynyň ozal belli bolmadyk antigeniniň bardygy anyklandy. Açyşy lukmanlar ýürek operasiýasyny geçirmäge taýýarlyk görýärkäler ýüze çykardylar diýip, The New Indian Express gazeti habar berýär.
Näsagyň gany iň ýaýran hasaplanýan O Rh + gan görnüşi diýip kesgitlendi. Emma donor gany saýlanylanda bu toparyň bar bolan dozalarynyň hiç biriniň-de oňa gabat gelmeýändigi ýüze çykdy.
"Öňdebaryjy serologiki usullary ulanyp, toparymyz ganyň “panreaktiwdigini” - ähli synag nusgalaryna laýyk gelmeýändigini anyklady. Biz ony seýrek ýa-da näbelli görnüşdir diýip güman etdik, 20 garyndaşynyň gan nusgalaryny barladyk, ýöne olaryň hiç biri gabat gelmedi" – diýip, klinikanyň hirurgy Ankit Matur gazete gürrüň berdi.
Operasiýa şowly geçdi, şonuň üçin hiç hili gan goýbermek gerek bolmady.
Ganyň nusgalary Beýik Britaniýadaky Halkara barlag laboratoriýasyna we Bangalorodaky gan merkezine iberildi. Hünärmenler on aýlap dowam eden barlaglardan soň CRIB atly täze antigeniň tapylandygyny tassykladylar. Ol Cromer ulgamyna degişli edildi. CRIB gysgaltmasy açylan ýeriň hormatyna Cromer, India, Bangalore diýip düşündirilýär.
Käbir immunologlar şeýle seýrek gan görnüşiniň döremeginiň sebitde ýakyn garyndaşlaryň özara nikalaşmak däbi bilen baglanyşykly bolup biljekdigine ynanýarlar.
