BMG-niň Baş sekretary Antoniu Guterreş Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna (LLDC3) gatnaşmak üçin Türkmenistana sapar bilen geler. Bu barada BMG-niň resmi habarlar saýtynda habar berildi.
Çäre 5–8 awgust aralygynda "Awaza" milli syýahatçylyk zolagynda geçiriler.
“Saparynyň çäklerinde Baş sekretar Türkmenistanyň ýolbaşçylary bilen hem-de beýleki ýurtlaryň liderleri we resmi wekilleri bilen ikitaraplaýyn duşuşyklary geçirer” diýlip, guramanyň habarynda aýdylýar.
Bu forum her on ýyldan bir gezek geçirilýär we deňze göni çykalgasy bolmadyk 32 döwletiň ýüzbe-ýüz bolýan meseleleriniň çözgüdine gönükdirilendir. BMG-niň ýolbaşçysynyň şahsy gatnaşmagy bu möhüm halkara çäräniň ähmiýetini nygtaýar.
Statistika görä, deňze çykalgasy bolmadyk ýurtlaryň söwda çykdajylary dünýäde orta görkezijisinden 74% ýokary, olaryň dünýä söwdasyndaky paýy bolsa bary-ýogy 1,2%-e barabar. Şu 32 ýurtdan 16-sy iň pes ösen döwletleriň hataryna girýär.
