5-nji awgustda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň çäklerinde milli tagamlaryň festiwaly geçiriler.
"Türkmenistan" gazetinde habar berlişi ýaly, şu günler bu festiwala gatnaşjak aşpezler dost-doganlyk ýurtlardan Awaza gelip başladylar. Olar 5-nji awgustda Merkezi Aziýa ýurtlarynyň hem-de Azerbaýjanyň milli tagamlaryny taýýarlap görkezerler. Merkezi Aziýa ýurtlarynyň milli günlerinde, ýagny 6 — 8-nji awgustda hem goňşy ýurtlaryň tagamlary hödür-kerem ediler.
Milli tagamlaryň festiwalyna gatnaşyjylar Gündogar aşhanalarynyň, çaýhanalarynyň üýtgeşik hözirini görerler. Bereketli saçaklar yhlasly zähmetiň, agzybirligiň, jebislikde ýetilen döwletliligiň nyşany bolar. Olardaky naz-nygmatlar dünýäniň aşpezlik sungatynyň iň inçe syrlary bilen taýýarlanar. Ildeşlerimiz Gahryman Arkadagymyzyň başlangyjy bilen neşir edilen «Bereketli türkmen saçagy» atly iki jiltli kitapda beýan edilişi ýaly, türkmen milli naharlarynyň aýratynlyklary, taryhy we dünýäniň aşpezlik sungatynda tutýan orny barada has giňişleýin gürrüň bererler.
Şeýle festiwallaryň öň hem ýurdumyzda iri halkara çäreler bilen ugurdaşlykda geçirilendigini, olarda Merkezi Aziýa ýurtlarynyň, türki halklaryň aşhanasynda umumylyklaryň köpdüginiň bada-bat göze ilýändigini turuwbaşdan bellemek gerek. Bu meňzeşlikler biziň eýýamymyzdan öňki II asyrdan başlap, biziň eýýamymyzyň XV asyryna çenli döwürde Ýewropanyň hem-de Aziýanyň ýurtlaryny birleşdiren, Gündogar bilen Günbatary baglanyşdyran Beýik Ýüpek ýolunyň täsiri bilen hem düşündirilýär.
