2025-nji ýylyň iýul aýy Aşgabatda howanyň gyzgynlyk derejesiniň ýokary galmagy boýunça dördünji aý hökmünde hasaba alyndy — bu bolsa 1891-nji ýyldan bäri alnyp barylýan meteorologik gözegçilikleriň taryhynda rekord görkeziji boldy. Sinoptikleriň beren maglumatyna görä, iýul aýynda ortaça temperatura +33,5° bolup, bu bolsa köpýyllyk klimat derejesinden (+31,6°) 1,9° ýokarydyr.
Aşgabatda diňe 2018-nji (+35,2°), 2019-njy we 2021-nji (+33,7°) ýyllarda şundan ýokary görkezijiler hasaba alnypdy. Şu ýyl bolsa 31 günüň diňe 7-si klimat boýunça ortaça derejesine gabat gelip, galan 24 gününde temperaturasy kadadan ýokary boldy. Iýul aýynda iň ýokary temperatura +43,2°-e ýetdi — bu görkeziji öňki ýyllaryň derejesine gabat gelýär.
Aşgabatda iýul aýy üçin iň ýokary temperatura +46,8°, ýylyň ähli döwri üçin bolsa absolýut rekord +47,2° hökmünde bellidir.
2025-nji ýylyň iýulynda +40° we ondan ýokary temperatura bilen 12 gün hasaba alyndy: olaryň 8-si +40° bilen +41,9° aralygynda, 4-si bolsa +42° bilen +43,2° arasynda boldy.
Hünärmenler Aşgabatda we umuman, Türkmenistanda tomus paslynyň ýylsaýyn yssy geçýändigini belleýärler. 2013-nji ýyldan bäri iýul aýyndaky temperatura yzygiderli klimat normasyndan ýokary bolýar. Hatda 2016-njy ýylda iň “sowuk” diýip hasaplanan iýul aýynda hem ortaça temperatura +32,1° bolup, kadadan ýokarydy.
