Hemişelik doňaklyklaryň eremeginiň çaltlaşmagy sebäpli Demirgazyk Kanadadaky derýalaryň ýokary akymlary diýseň zäherlendi we posly açyk-mämişi reňke boýaldy.
Science žurnalynda çap edilen barlaga görä, bu sebitdäki hemişelik doňaklyk soňky buz döwrüniň ahyryndan bäri gaty çalt eräp başlady. Ylmy işiň awtorlary bolup geçýän üýtgeşmeleri açyk ýagdaýda ýerli balyklaryň göçýän ýollaryna eýýäm ýaramaz täsir eden ekologik betbagtçylyk hökmünde häsiýetlendirýärler.
1960-njy ýyllardan bäri Douson-Sitiniň demirgazygynda ýerleşýän barlag geçirilýän sebitde ortaça temperatura 2,6 gradus Selsiý töweregi ýokarlandy. Topragyň eremegi düzüminde sulfid minerallary bolan gadymy dag jynslaryny ýüze çykardy. Kislorod we suw bilen täsirleşende bu minerallar okislenýär, kislotany we agyr metallary bölüp çykarýar hem-de ýagyş bilen ýuwlup suw ýollaryna düşýär.
Hünärmenler hemra suratlaryny ulanyp, Ýukon we Makkenzi derýalarynyň basseýnleriniň arasynda zyýan ýeten 146 derýanyň bardygyny anykladylar.
Ýerüsti seljermeler suwdaky kislotalylyk derejesiniň we hapalaýjy maddalaryň konsentrasiýasynyň häzirki wagtda senagat şahtalaryndan çykarylýan zyňyndylaryňky bilen deňeçerdigini we diri organizmler üçin ýiti zäheriň çenden aşadygyny tassyklady.
