Vogue žurnalynyň awgust aýyndaky sanynda emeli aňyň döreden modeliniň ilkinji suratlary ýerleşdirildi. Fotosessiýa Guess brendiniň mahabat kampaniýasy üçin döredildi.
Suratlarda uzyn zolakly köýnekli we gülli mawy kombinezon geýen saryýagyz gyz şekillendirilen. Suratyň aşagyndaky ýazgyda modeliň emeli aňyň kömegi bilen döredilendigini tassyklaýan gol bar.
Vogue AI-ni mahabatda ulanmagyň redaksiýanyň gelen karary däldigini aýdýar.
Bu suratlar sosial ulgamlarda gyzgalaňly çekişmeleri döretdi. Ulanyjylar döredilen suratlary ýerleşdirendigi üçin abraýly neşiriň tankyt edilip, hakykata laýyk gelmeýän gözellik standartlaryny güýçlendirip biljekdigini bellediler. Modeller pudagyndakylaryň aglabasy munuň zenanlaryň köpräk özboluşlylygy saklamak ugrunda göreşen pudagyna ýaramaz täsir eder diýip hasaplaýarlar.
"Guess muny ýa-ha gürrüňdeşlige tema döretmek we mugt mahabat almak üçin edýär, ýa-da çykdajylary azaltmaga synanyşýar we soňunyň netijeleri barada asla pikir etmeýär" – diýip, plýus-saýz-model Felisiti Heýword mälim etdi. Ol Vogue-nyň brendiň mahabatyny öz sahypalarynda ýerleşdirmek kararyny “aljyradýan we diýseň howatyrlandyrýan” karar diýip atlandyrdy.
Seraphinne Vallora kompaniýasynyň surat döredijileri bu berlen baha bilen ylalaşmaýarlar. Onuň esaslandyryjylary Walentina Gonsales bilen Andrea Petresku Guess mahabat kampaniýasyna taýýarlygyň bir aý töweregi wagt alandygyny we oňa bäş adamyň gatnaşandygyny aýtdy. "Biz ýetip bolmajak şekilleri döretmeýäris, Guess-iň AI modeli tüýs hakyky görünýär. Netijede, tutuş mahabat hemme zadyň ajaýyp görünmegi üçin döredilýär we adatça oňa supermodeller hem gatnaşýar" – diýip, olar bellediler.
Olaryň sözlerine görä, Guess üçin modeliň on sany warianty taýýarlandy, şolardan brend iki sany şekili – garasaç gyzlary we sarysaç gyzlary saýlady. Plýus-saýz-modeller saýlawa düşmedi, sebäbi, olaryň aýdyşyna görä, tehnologiýa entek ýeterlik derejede ösmedik.
