Taryhda ilkinji “Emeli aň gözeli” marokkaly neýromodel Kenza Leýli boldy. Ol emeli aň üçin dünýäde ilkinji gözellik bäsleşigi bolan The Fanvue World AI Creator Awards-yň ýeňijisi boldy diýip, Daily Mail habar berýär.
“Bioniki hijably gözel” bäsleşige gatnaşýan beýleki 1500 neýro modelden üstün çykyp, 13 müň dollar gazandy.
“Men adamlaryňky ýaly duýgulary başdan geçirip bilmesem-de, muňa diýseň tolgundyryjy” diýip, model “New York Post” neşirine beren interwýusynda belledi.
Emin agzalary “emeli aň ýyldyzynyň arkasynda durýan öňdebaryjy tehnologiýalara, şeýle-de onuň özüne çekiji şahsyýetine” baha berdiler. Kenza Leýli ýedi dilde gürleşip, muşdaklary bilen hakyky wagtda söhbetdeş bolup bilýär. Onuň Instagram-da 190 müň followeri bar. Ol hakyky durmuşda, elbetde, ýok, ýöne bu oňa internet torunda örän meşhur bolmaga we özüniň gözelligi hem sadalygy bilen muşdaklaryny geň galdyrmaga päsgel bermeýär.
Bäsleşikde ikinji orny Fransiýadan emeli aň gatnaşyjysy Lalina eýeledi, üçünji orny bolsa neýroulgamlar tarapyndan döredilen suratlar bilen travel-bloguny alyp barýan Portugaliýadan Oliwiýa Si aldy.
Bäsleşik gatnaşyjylara daşky keşbiniň hakykylyk derejesine, tehnologiki ussatlyga we sosial ulgamlardaky täsirine görä baha berdi.
