Şu gije futbol boýunça Dünýä çempionatyna badalga berler. Dabaraly açylyş oýun sagat 00:00-da başlap, “A”-toparçasyndan orun alan Meksika milli ýygyndysy bilen Günorta Afrika Resbuplikasynyň (GAR) ýygyndysynyň arasynda, meşhur "Estadio Azteca" stadionynda geçer.
Toparçadaky ikinji oýunda Günorta Koreýanyň milli ýygyndysy Çehiýa döwletiniň ýygyndysy bilen duşuşar. Bu oýun Aşgabat wagty bilen 07:00 da başlanar.
San boýunça 23-nji gezek geçirilýän futbol boýunça Dünýä çempionatyna bu gezek iň köp ýygyndy, ýagny 48 topar gatnaşar. 48-ýurduň ýygyndysy her biri dört topar ýerleşdirlen 12 sany toparçany emele getirer.
Geliň, toparçalaryň düzümini ýatlap geçeliň:
“A” toparça: Meksika, GAR, Günorta Koreýa, Çehiýa;
“B” toparça: Kanada, Bosniýa we Gersegowina, Katar, Şweýsariýa;
“C “toparça: Braziliýa, Marokko, Gaiti, Şotlandiýa;
“D” toparça: ABŞ, Paragwaý, Awstraliýa, Türkiýe;
“E” toparça: Germaniýa, Kýurasao, Kot-d’Iwuar, Ekwador;
“F” toparça: Niderlandlar, Ýaponiýa, Şwesiýa, Tunis;
“G” toparça: Belgiýa, Müsür, Eýran, Täze Zelandiýa;
“H” toparça: Ispaniýa, Kabo-Werde, Saud Arabystany, Urugwaý;
“I” toparça: Fransiýa, Senegal, Yrak, Norwegiýa;
“J”toparça: Argentina, Alžir, Awstriýa, Iordaniýa;
“K” toparça: Portugaliýa, Kongo DR, Özbegistan, Kolumbiýa;
“L” toparça: Angliýa, Horwatiýa, Gana, Panama.
Her toparçadan birinji we ikinji orny eýelän toparlar, şeýle-de toparçalaýyn tapgyr oýunlarda 3-nji orun eýelän toparlaryň hem sekizisi, has takygy, umumy alanyňda 32 (24+8) topar gönümel Pleý-off, ýagny 1/16 final (utulan çykdy) tapgyra çykmagy başararlar.
Mundan hem düşnükli edip aýtsak, ozalkylara garanyňda, pleý-off tapgyrlaryň sany uzalar. Bu diýildigi, umumy 104 oýuna çenli oýun sanlary köpelip, çempion bolan ýygyndynyň 8 oýun geçirmelidigini aňladýar.
1/16 Final tapgyry 28-nji iýundan başlap, iýulyň 3-ine çenli dowam eder.
1/8 Final tapgyry bolsa iýulyň 4 -inden 7-si aralygynda geçiriler.
Çärýek Final 9-njy iýuldan 11-nji iýul aralygynda geçiriler.
Ýarym final bolsa 14 we 15-nji iýulda geçirilip, eýýam ol ýerde finalçylaryň we 3-nji ýer üçin göreşjek ýygyndylaryň ady mälim bolar.
3-nji ýeri eýelän toparyň kimdigini, ýagny bürünç medalyň eýelerini biz 18-nji iýul güni anyklarys.
Final oýny bolsa 19-njy iýulda geçirilip, şol gün çempionyň ady mälim bolar.
«Türkmenistan Sport» telekanaly dünýä çempionatynyň ähli duşuşyklaryny göni ýaýlymda görkezer. Rus dilinde bolsa ähli duşuşyklary «Матч ТВ» telekanaly we şol bir atly holdinge degişli bolan ýöriteleşdirilen («Матч Премьер», «Матч! Арена», «Матч! Игра») ýaýlymlar görkezer.
Sözümizi jemläp aýtsak, şu gije badalga alyp, 39 günläp dowam etjek uly futbol ýaryşynyň ähli gyzykly wakalary, şeýle-de garaşylan we garaşylmadyk netijeleri bilen Sizi habarly etmegi tmcars.info öz üstüne alýar.
Biziň bilen galyň!
