Şu gün, 24-nji iýulda Türkmenistanyň Halk Maslahatynyň Başlygy Gurbanguly Berdimuhamedow bilen Özbegistanyň Prezidenti Şawkat Mirziýoýewiň arasynda telefon arkaly söhbetdeşlik boldy. Bu barada özbek Lideriniň resmi saýtynda habar berilýär.
Türkmen halkynyň Milli Lideri goňşy döwletiň Baştutanyny doglan güni bilen mähirli gutlap, oňa berk saglyk, abadançylyk, uly üstünlikler, şeýle hem Özbegistanyň halkyna parahatçylyk we gülläp ösüş arzuw etdi.
Taraplar dostluk, goňşuçylyk we strategik hyzmatdaşlyk gatnaşyklaryny pugtalandyrmagyň häzirki meselelerini ara alyp maslahatlaşdylar. Şu ýylyň aprelinde Samarkantda geçirilen ýokary derejeli duşuşykda gazanylan ylalaşyklarynyň iş ýüzünde durmuşa geçirilmeginiň ähmiýeti bellenildi.
Ikitaraplaýyn haryt dolanyşygynyň ösmegi, kärhanalaryň we işewür toparlaryň arasynda hyzmatdaşlygyň çuňlaşmagy, şeýle hem medeni-ynsanperwer alyş-çalyşlaryň işjeňleşmegi kanagatlanma bilen bellenildi.
Söhbetdeşligiň dowamynda halkara we sebit meseleleri boýunça pikir alyşmalar boldy. Şeýle hem BMG-niň deňze çykalgasy bolmadyk ösüp barýan ýurtlar boýunça geçiriljek nobatdaky maslahatyna we Merkezi Aziýa döwlet Baştutanlarynyň nobatdaky Geňeşine taýýarlyk ara alnyp maslahatlaşyldy.
