Russiýanyň Perm ülkesinde suwuň yza çekilmegi üýtgeşik paleontologiki açyşlara getirdi. Şirokowskiý suw howdanynyň kenarynda Ýeriň ýüzünde 550 mln ýyldan gowrak ozal ýaşap geçen gadymy köp öýjükli organizmleriň yzlary tapyldy. Bu barada RYA-nyň Geologiýa instituty habar berdi.
Gürrüň ediakar faunanyň wekilleri – Ýerde oňurgalylar we ýaşaýşyň beýleki çylşyrymly formalary peýda bolmazdan öň ýaşan ýumşak bedenli organizmler barada gidýär. Skeletiň ýokdugy sebäpli olar geologik ýyl ýazgylarynda seýrek saklanyp galýar. Şonuň üçin tapyndy ylym üçin örän gymmatlydyr.
Yzlar bir aýlap dowam eden ekspedisiýanyň dowamynda howdandaky suwuň derejesiniň kem-käsleýin peselen wagty ýüze çykaryldy. Alymlar Aspidella, Mawsonites, Hiemalora ýaly jandarlaryň, şeýle-de Orta Ural üçin ilkinji gezek ýapraklara ýa-da ýeleklere meňzeş rangeomorflaryň yzlaryny tapdy.
“Biz diňe bir sowet geology Ýuriý Bekker tarapyndan öwrenilen zatlary däl, eýsem başga bir ýerde – Lysaýa dagynyň eteginde täze organizmleriň hem yzlaryny tapdyk” – diýip, ekspedisiýanyň ýolbaşçysy Anton Kolesnikow gürrüň berdi.
Ylmy gözleg Gondwana Research žurnalynda neşir edildi. Alymlar bu tapyndylar Ýerdäki ýaşaýşyň ösüşi baradaky düşünjäni üýtgedip biler diýip hasaplaýar.
