ABŞ-nyň Prezidenti Donald Trampda dowamly wena ýetmezçiligi kesel kesgidi goýuldy. Bu barada Ak tamyň beýanyna salgylanýan Bloomberg habarlar gullugy habar berdi.
Metbugat sekretary Kerolaýn Lewittiň sözlerine görä, köpçülik Amerikanyň ýurt baştutanynyň topuklaryndaky çişe we elindäki göge üns berenden soň, 79 ýaşly Prezident lukmançylyk barlagyndan geçdi. Lukmanlar çişiň wena damarlaryndaky bozulma sebäpli ýüze çykandygyny aýtdylar. Lewitt munuň 70 ýaşdan uly adamlarda adaty ýagdaýdygyny we uly ýaşly her ýigriminji adamda duş gelýändigini düşündirdi.
Ak tamyň lukmany Şon Barbabella Trampyň wena damarlarynyň trombozynyň, arterial keseliň, ýürek ýetmezçiliginiň ýa-da böwrek ýetmezçiliginiň alamatlarynyň ýokdugyny aýtdy. Gan barlaglary adaty çäklerde. Lukman Trampyň fiziki taýdan oňaýsyzlyk duýmaýandygyny we ýagdaýynyň kemsiz gowudygyny aýtdy.
Lewittiň aýtmagyna görä, Trampyň ellerindäki gökler ýygy-ýygydan bolýan el gysyşmalar sebäpli peýda çykýar we ýürek-damar keselleriniň öňüni almak üçin Prezidente bellenen aspirini içmeginiň "zyýansyz täsiridir".
