Britaniýanyň Heatherwick Studio binagärlik býurosy Bangkogyň (Tailand) merkezinde guruljak täze Hatai myhmanhana toplumynyň taslamasyny hödürledi. Bina kagyz fonarlaryň stilinde iki aýlaw şekilli köp gatly diňden ybarat bolar. Toplumda iki myhmanhana – Six Senses we Narai Hotel ýerleşdiriler.
Taslama Silom sebitinde 10 500 inedördül metrden gowrak ýeri eýeleýär. 300 myhmanhana otagyndan başga-da, topluma bal zaly, sagaldyş merkezi, konferensiýa zallary we beýleki infrastruktura obýektleri girer. Diňler günüň garaňky wagtynda ýagty saçýan görnüşde taslanar.
Binalaryň aşagynda ýerüsti pyýada ýodalary bilen 5200 inedördül metr meýdanly jemgyýetçilik giňişligi dörediler. Ol ýerde açyk bazar, çagalar bagy, çäreler üçin ýer we ýaşyl zolak bolar.
Heatherwick Studio binagärlik býurosynyň esaslandyryjysy Tomas Hizerwikiň belleýşi ýaly, olar biri-biriniň üstünden gurnalan we bilelikde gözýetimde has ýumşak görnüşi döredýän birnäçe fonarlary oýlap tapdy. Olar adamlaryň arkaýyn gezelenç edip, dynç alyp we jemleşip bilmegi üçin ýagyşdan goragly, baglykly we howdanly ýeri döretmek isleýär.
Heatherwick Studio bu Hatai toplumynyň 2028-nji ýylda açyljakdygyny habar berdi. Bu studiýanyň Aziýada üçünji taslamasy bolar. 2023-nji ýylda býuro Tokioda ýaşyl baýyrlara meňzeş Azabudai Hills sebitiniň gurluşygyny tamamlady, ýakynda bolsa Hytaýyň Sian şäherinde agaç görnüşinde dik seýilgähi hödürledi.
