19-nji iýulda Hytaý Halk Respublikasynyň Türkmenistandaky täze bellenen Adatdan daşary we Doly ygtyýarly ilçisi Szi Şumin maşgalasy bilen bilelikde Aşgabada geldi.
Aşgabadyň halkara howa menzilinde ilçini Türkmenistanyň Daşary işler ministrliginiň wekilleri we HHR-iň ilçihanasynyň işgärleri garşyladylar.
Szi Şumin Hytaýyň Türkmenistandaky diplomatik missiýasynyň ýolbaşçysy wezipesine bellenmegini uly hormat hökmünde görýändigini aýtdy. Ol iki ýurduň arasynda giň gerimli strategik hyzmatdaşlyk gatnaşyklarynyň ýokary derejede saklanyp galýandygyny we hyzmatdaşlygyň yzygiderli çuňlaşýandygyny belledi. Ilçi döwlet ýolbaşçylarynyň ylalaşyklaryny ýerine ýetirmek, amaly hyzmatdaşlygy çuňlaşdyrmak, ynsanperwer alyş-çalyşlary giňeltmek we hytaý-türkmen gatnaşyklaryny berkitmek üçin türkmen tarapynyň ähli pudaklary bilen işleşmäge taýýardygyny nygtady.
Türkmen tarapy onuň işini doly goldamaga we ikitaraplaýyn gatnaşyklary mundan beýläk-de ösdürmäge ýardam etmäge taýýardygyny tassyklady.
Szi Şumin 1972-nji ýylyň maý aýynda doguldy. Türkmenistana bellenmezinden ozal, ol HHR-iň Daşary işler ministrliginiň Ýewropa we Aziýa departamentiniň direktoratynyň orunbasary we Hytaýyň Täjigistan Respublikasyndaky ilçisi bolup işledi.
