18-nji iýulda Moskwada Garaşsyz Döwletleriň Arkalaşygynyň (GDA) Ykdysady geňeşiniň 106-njy mejlisi geçirildi. Mejlisiň işine Türkmenistanyň Russiýa Federasiýasyndaky ilçisi E.Aýdogdyýewiň ýolbaşçylygyndaky türkmen wekiliýeti gatnaşdy diýip, Türkmenistanyň DIM-nde habar berdiler.
Mejlisiň barşynda GDA gatnaşyjy ýurtlaryň ykdysady hyzmatdaşlygyna degişli meseleleriň giň toplumy, şeýle hem sebitleýin energetika howpsuzlygyny üpjün etmek, atom energiýasyny parahatçylykly maksatlar üçin peýdalanmak, gurluşyk işinde nyrh emele getirmek, tokaý hojalygy hem-de tokaý senagaty we beýleki ugurlardaky hyzmatdaşlyga degişli birnäçe resminamalaryň taslamalaryna garaldy.
Şol bir wagtyň özünde mejlise gatnaşyjylar 2024-nji ýylyň dowamynda 2030-njy ýyla çenli döwür üçin GDA-nyň ykdysady ösüş strategiýasynyň birinji tapgyryny (2021–2025) amala aşyrmak boýunça Hereketleriň meýilnamasynyň durmuşa geçirilmegi bilen baglanyşykly birnäçe meseleleri ara alyp maslahatlaşdylar.
GDA-nyň Ykdysady geňeşiniň indiki mejlisi 2025-nji ýylyň 5-nji sentýabrynda Duşenbe şäherinde geçiriler.
