Netflix filmleriň we seriallaryň önümçiliginde generatiw emeli aňdan peýdalanyp başlady. Munuň ilkinji mysaly Argentinanyň “Eternawt” (El Eternauta) ylmy-fantastiki serialy boldy. Onuň ahyrky kadrlary doly derejede neýroulgam tarapyndan döredildi.
Kompaniýanyň egindeş ýerine ýetiriji müdiri Ted Sarandos täze tehnologiýanyň wizual effektleri döretmek prosesini ep-esli çaltlaşdyrmaga mümkinçilik berýändigini belledi. Onuň aýtmagyna görä, EA-nyň kömegi bilen ahyryndaky binanyň ýumrulýan sahnasy adaty VFX gurallary ulananyňdan 10 esse çalt taýýarlandy. Üstesine-de, ol birnäçe esse arzan düşdi.
“Bu kämil gurallar bilen işleýän hakyky adamlar” – diýmek bilen, ol EA-nyň döredijilere kontenti diňe bir tygşytly däl, eýsem has gowy etmäge kömek etýändigini sözüniň üstüne goşdy.
Şeýle-de, tehnologiýa kompaniýanyň beýleki iş ugurlarynda hem ornaşdyrylýar. Baş direktor Greg Piters EA-nyň eýýäm teklipleri şahsylaşdyrmak, kontent gözlemek we mahabaty dolandyrmak üçin ulanylýandygyny belledi. 2025-nji ýylyň ikinji ýarymynda Netflix EA-nyň esasynda interaktiw mahabaty işe girizmegi meýilleşdirýär.
2025-nji ýylyň ikinji çärýeginiň jemi boýunça, Netflix-iň girdejisi 11,08 mlrd dollar boldy. Bu 2024-nji ýylyň degişli döwri bilen deňeşdirilende 16% köpdür. Arassa girdeji 3,13 mlrd dollar boldy. Birinji ýarymýyllykda tomaşaçylar kontent üçin 95 mlrd sagat sarp etdi, olardan üçden biri iňlis dilli däl taslamalaryň paýyna düşdi.
