Amerikaly biologlar sesleriň kabul edilişine jogapkär duýgur öýjükleriň dikeldilmegine gözegçilik edýän genleri tapdylar. Bu adamlarda kerrewligi we kerligi bejermegiň usullaryny işläp düzmäge kömek edip biler diýip, Stouers lukmançylyk barlag institutynyň (SIMR) metbugat gullugy habar berdi.
Barlag zebra balygynyň işbillerinde geçirildi. Bu balyklarda suwdaky yrgyldylary kesgitlemäge kömek edýän gapdal çyzyk diýilýän duýgur organ bar. Ol adamlardaky we süýdemdirijilerdäki içki gulak ýaly düwünçejik öýjüklerden ösüp ýetişýär. Alymlar antibiotik ulanyp, balykdaky duýgur öýjükleri ýok etdiler we olaryň dikelişine gözegçilik etdiler.
Gözegçilikler öýjükleriň iki toparynyň täzeleniş prosesine gatnaşýandygyny görkezdi. Olar сcnd2a we ccndx ýaly dürli genleri işjeňleşdirýärler. Olaryň biri öýjük bölünişigine, beýlekisi - eşidiş reseptorlaryna öwrülmegine sebäp bolýar.
Adamlarda tüý öýjükleri diýilýän eşidiş reseptorlary zeper ýetenden soň täzeden döremeýär we eşidişiň ýitmegine sebäp bolýar. Balyklarda, ýerde-suwda ýaşaýanlarda we guşlarda şeýle öýjükler täzeden döräp biler. Alymlar esasy genleri öwrenmek geljekde adamlarda şuňa meňzeş prosesleriň döremegine kömek eder diýip umyt edýärler.
