Serdar Berdimuhamedow «Türkmenistanyň Bitaraplygynyň 30 ýyllygyna» atly ýubileý medalyny döretmek hakynda» Türkmenistanyň Kanunyna gol çekdi. Degişli resminama 11-nji iýulda giňişleýin Hökümet mejlisiniň barşynda gol çekildi.
Bu medal bilen Türkmenistanyň Garaşsyzlygyny, hemişelik Bitaraplygyny hem-de halkara parahatçylygy we ynanyşmagy pugtalandyrmakda, ýurdumyzyň syýasy, ykdysady, medeni ugurlarynda gazanan üstünliklerine mynasyp goşantlaryny goşan adamlar sylaglanylar.
Resminama laýyklykda, Türkmenistanyň ýubileý medaly hakynda Düzgünnama hem-de medalyň Ýazgysy tassyklanyldy.
«Türkmenistanyň Bitaraplygynyň 30 ýyllygyna» atly Türkmenistanyň ýubileý medaly burçlarynyň aralygynda Gün şöhlelerini aňladýan altyn çaýylan dürli uzynlykdaky taýajyklar ýerleşdirilen gyrasyna altyn çaýylan sekizburçluk görnüşinde ýasalan. Sekizburçlugyň ýerligi ýaşyl reňk bilen syrçalanan her burçunda altyn çaýylan milli nagyş ýerleşdirilen. Medalyň umumy diametri 44 mm.
Ýubileý medaly 925 mähekli kümüşden ýasalyp, onuň ýüzüne altyn çaýylan.
