Apple kompaniýasynyň ýolbaşçylygynda üýtgeşmeler boldy: operasion direktor (COO) wezipesine kompaniýada 30 ýyldan gowrak wagt bäri işläp gelýän Sabih Han bellenildi. Ol kompaniýadan gidýän Jeff Uilýamsyň ýerine geldi.
Uilýams uzak wagtlap Tim Kuguň mümkin bolan oruntutary hökmünde kabul edilipdi. Ýagny, eger-de Kuk birdenkä wezipesinden çekilen ýagdaýynda, kompaniýanyň ýolbaşçylygynda üznüksiz geçişi üpjün edip biljek adam Uilýamsdy. Indi bolsa, şol wezipe Hanyň üstüne ýüklenýär, ol hem ozalky ýolbaşçysy ýaly gönüden-göni Kuga hasabat berer.
Şeýle-de bolsa, bilermenleriň pikirine görä, Hanyň bu wezipä bellenmegi onuň geljekde baş direktor bolup biljekdigini aňlatmaýar. Sebäbi, ýokary derejeli ýolbaşçylaryň ýaşy bu wezipä geljekde geçmeklerine päsgelçilik döredip biler: Uilýams 61, Han bolsa 59 ýaşynda. Tim Kuk bolsa, awgustda 63 ýaşyny doldurýar. Eger-de ol ýene birnäçe ýyl wezipesinde galsa, onda onuň kompaniýadan gitjek wagty Han adaty pensiýa ýaşyna golaý bolar. Şeýle-de bolsa, belläp geçsek, Apple kompaniýasynda resmi taýdan ýolbaşçylar üçin ýaş çäklendirmesi ýok.
Şunuň bilen baglylykda, «9to5mac» portalynyň hem belleýşi ýaly, kompaniýanyň ýolbaşçylygyna has mümkin dalaşgär hökmünde Jon Ternus galýar – ol enjamlaryň inženerçiligi boýunça 50 ýaşly uly wise-prezidentdir. Ol dolandyryş babatda barha köp tejribe toplaýar, bu bolsa ony häzirki oruntutarlyk strategiýasynyň çäginde güýçli dalaşgäre öwürýär.
