7-nji iýulda Türkmenistanyň Serbiýadaky Adatdan daşary we Doly ygtyýarly ilçisi E.Aýdogdyýew Serbiýanyň Prezidenti Aleksandr Wuçiçe ynanç hatlaryny gowşurdy. Dabara Belgrad şäherinde Prezidentiň köşgünde geçirildi. Ilçi diplomatik işini Moskwa şäherinde oturan ýerinden alyp barar.
Türkmenistanyň DIM-niň habar berşi ýaly, dabaranyň dowamynda ilçi Serbiýanyň Baştutanyna we ýurduň ähli halkyna Türkmenistanyň Prezidenti Serdar Berdimuhamedowyň hem-de Türkmenistanyň Halk Maslahatynyň Başlygy Gurbanguly Berdimuhamedowyň mähirli salamlaryny we iň oňat arzuwlaryny ýetirdi.
A.Wuçiç hem öz gezeginde iň gowy arzuwlaryny beýan etdi.
Duşuşykda iki ýurduň arasyndaky gatnaşyklary berkitmek, ikitaraplaýyn syýasy, söwda-ykdysady, medeni-ynsanperwer ugurlardaky hyzmatdaşlygy giňeltmek meseleleri ara alnyp maslahatlaşyldy.
A.Wuçiç türkmen diplomatyny ýokary wezipä bellenmegi bilen gutlap, Türkmenistan bilen Serbiýanyň arasyndaky dostlukly gatnaşyklaryň iki ýurduň bähbidine mundan beýläk-de pugtalandyryljakdygyna ynam bildirdi.
