Türkmenistanyň Daşary işler ministrligi Ukrainanyň köpçülikleýin habar beriş serişdelerinde Türkmenistan barada ýaýradylýan maglumatlar bilen baglylykda beýannama bilen çykyş etdi.
Türkmen tarapy 2025-nji ýylyň 8-nji iýulynda «FREEДОМ» ukrain teleýaýlymynda Türkmenistanyň internete elýeterlilik nukdaýnazaryndan göýä “ýapyk ýurt” hökmünde görkezilmegi bilen bagly hakykata laýyk gelmeýän we bir taraplaýyn häsiýetli maglumata düýpli nägilelik bildirýär.
"Munuň ýaly ýagdaýy aýratyn geň galdyrýan zat – şu günki Türkmenistan barada hakyky düşünjesi bolmadyk, ýurdumyza hiç haçan sapar etmedik, onuň döwlet we jemgyýetçilik düzümleri hem-de türkmen metbugat wekilleri bilen aragatnaşyk saklamaýan bir teleýaýlymyň wekilleri beýle maglumatlary ýaýratmaga nähili hukuk bar?!" diýlip, DIM-niň beýannamasynda aýdylýar.
Türkmenistanyň DIM-i «FREEДОМ» teleýaýlymynyň bu görnüşli galp we ýoýulan maglumatlary ýaýratmagynyň ilkinji gezek däldigini belleýär. Bu hereketler Türkmenistanyň Garaşsyzlygynyň dowamynda ukrain halkyna yzygiderli görnüşde berip gelen ykdysady we ynsanperwer goldawynyň çäginde bolup geçýär.
1990-njy ýyllardan başlap Türkmenistan Ukraina uly möçberde tebigy gaz iberipdi. Şonuň bilen birlikde, ukrain kompaniýalarynyň birnäçesi energetika, ýol-ulag, aragatnaşyk, infrastruktura we beýleki ugurlar boýunça ýurdumyzda milliardlarça amerikan dollaryna deň bolan iri taslamalary amala aşyrdy. Olaryň birnäçesi häzirki güne çenli işini dowam etdirýär.
"Aýdylanlary nazara alyp, käbir habar beriş serişdeleriniň wekilleri “ýagşylyga – ýagşylyk bilen jogap bermeli” diýen ajaýyp hakykaty ýatlarynda saklasalar ýerlikli bolar" diýip, beýannamada aýdylýar.
Ýokarda agzalanlara laýyklykda, türkmen tarapy Ukrainanyň maglumat syýasatyna jogapkär degişli döwlet edaralaryndan şuňa meňzeş wakalaryň geljekde gaýtalanmazlygy üçin ukrain kanunçylygynyň çäginde zerur çäreleri görmegini talap edýär.
