Ýewropa Bileleşiginiň ýurtlarynda elektron gurluşlaryň sarp ediji aýratynlyklaryny, şol sanda akkumulýatoryň çydamlylygyny bellik arkaly görkezmegi göz öňünde tutýan täze düzgünler hereket edip başlady. Akkumulýatoryň ömrüni kesgitlemek üçin zarýad sikliniň – batareýanyň doly zarýadsyzlanmagynyň we ýene zarýad almagynyň sany ölçenýär. Sikl köp boldugyça, akkumulýator uzak hyzmat edýär.
Hödürlenen maglumatlara görä, Samsung smartfonlary 2000 zarýad sikline çydamly. Bu Google we Apple gurluşlarynyň görkezijilerinden iki esse ýokarydyr.
Ähli Google Pixel modelleri, şeýle-de iPhone 16 Pro Max-dan başlap, M3 çipli iPad Air-e çenli Apple-iň önümleri üçin 1000 zarýad sikli berilýär. Fairphone 5 1300 sikle, altynjy nesil Fairphone bolsa 1000 sikle niýetlenýär. Şeýle ömür Motorola modelleriniň aglabasy we OnePlus 13 üçin hem berilýär. One Plus 13R üçin 1200 sikl görkezilýär.
Nothing brendiniň smartfonlary, şol sanda CMF Phone 2 Pro, Sony Xperia 1 VII 1400 zarýad sikline niýetlenendir. Samsung-yň arzan Galaxy A26 we A16 smartfonlary 1200 zarýad sikline çydaýar. Samsung-yň galan smartfonlary, ÝB-niň maglumatlaryna görä, 2000 sikle eýedir.
Ýewrokomissiýanyň saýtynda bu görkezijileriň nähili alnandygy aýdyňlaşdyrylmaýar. Şeýle-de, akkumulýatoryň ömrüne himiki düzümleriň, mysal üçin, OnePlus 13-de kremniý-uglerod batareýalarynyň ulanylmagynyň nähili täsir edýändigi düşündirilmeýär.
