Hyundai Motor Group täze Elantra we Tucson modellerinde PLEOS Connect atly multimedia ulgamyny hödürlär. Bu kompaniýanyň «programmalaýyn kesgitlenýän awtoulaglar» (SDV – software-defined vehicle) üçin niýetlenen ilkinji özboluşly programma platformasydyr.
Ulgam ilkinji gezek sekizinji nesil Elantra modelinde 2026-njy ýylyň ikinji çärýeginde, soň bolsa şol ýylyň üçünji çärýeginde Günorta Koreýadaky täze Tucson modelinde peýda bolar.
PLEOS Connect platformasy Android Automotive operasion ulgamynyň binýadynda gurlup, Gleo AI atly emeli aň modelini ulanýar. Ulgam sürüji bilen gepleşik gurap bilýär, ýoluň ýagdaýy, howa maglumaty, ulagyň dolandyrylyşy baradaky soraglara jogap berýär we şol bir wagtda ugur kesgitlemek, şeýle-de islenen aýdym-sazy açmak ýaly birnäçe buýruklary hem ýerine ýetirýär.
Ulgamyň interfeýsi minimalistik stilde bolup, fiziki düwmeleri bolmadyk planşet görnüşli sensor ekrany öz içine alýar. Gurallar paneliniň ýokarsyndaky ykjam displeý sürüjiniň ünsüniň sowulmazlygy üçin, esasy maglumatlary onuň göni öňünde görkezip durýar. PLEOS Connect birden köp wezipäni ýerine ýetirmegi (multitasking) goldaýar, birnäçe goşundyny bir wagtda işletmäge mümkinçilik berýär, bu bolsa ulanyjynyň ulag bilen aragatnaşygyny smartfonyňka meňzedýär.
Platformanyň işlenip düzülişini kompaniýanyň prezidenti Son Çan Hýonyň özi gözegçilikde saklaýar. Ol SDV bölümini, 42Dot startapyny we Hyundai & Kia AVP bölümlerini bir ugra tarap gönükdirýär. Hyundai 2030-njy ýyla çenli dünýäde 20 milliondan gowrak ulagyny PLEOS Connect ulgamy bilen üpjün etmegi meýilleşdirýär, bu kompaniýanyň sanlylaşdyrylmagyna tarap möhüm ädimleriň biri bolar.
Ulgam ilki bilen Günorta Koreýada peýda bolar, soň bolsa dünýä bazaryna ýaýradylar.
PLEOS Connect bulut hyzmatlaryny we yzygiderli «howa arkaly» täzelenmeleri goldaýar, bu bolsa Hyundai-niň sanly awtoulag platformalaryna geçişinde möhüm element bolup durýar.
