Arheologlar Täjigistanda Kuşan imperiýasy döwründe ýaşan bir aýalyň adyny saklaýan baktriýa dilindäki ýazgy bilen keramiki gaby tapdy. Tapyndy Sarband obasynyň golaýyndaky gadymy Halkajar şäherçesinde ýüze çykaryldy diýip, The Times of Central Asia-a salgylanyp, Archaeology Magazine habar berýär.
Biziň eýýamymyzyň I-III asyryna degişli hasap edilýän gap iki saply küýzedir. Ylmy gözlegçiler tarapyndan edilen terjimä görä, onda “Bu suw küýzesi aýal Sagkina degişli” diýlip ýazylan.
Täjigistanyň Milli muzeýiniň arheologlarynyň maglumatlaryna görä, “Sagkina” ady sebitdäki at dakmak däplerini öwrenmek üçin gyzyklanma döredip, Kuşan eýýamynyň zenan atlary baradaky maglumatlaryň üstüni ýetirýär.
Alymlar şeýle tapyndylaryň Kuşan imperiýasynyň ilatynyň arasynda sowatlylygyň ýaýrandygyny hem-de şahsy predmetlere bellik goýmak tejribesini görkezýändigini belledi.
Kuşan imperiýasy häzirki Owganystanyň, Pakistanyň, Hindistanyň, Özbegistanyň we Täjigistanyň çäklerini eýeläpdir we gadymy döwrüň iň uly hem iň täsirli döwletleriniň biri hasaplanypdyr.
