Birleşen Arap Emirlikleri Toncoin blokçeýn platformasy bilen hyzmatdaşlykda durmuşa geçirilýän täze maksatnama arkaly on ýyllyk altyn wiza almak mümkinçiligini hödürledi.
Wiza almak üçin ýüz tutýan adam üç ýyl möhlet bilen azyndan 100 müň dollary TON belgilerine goýmaly. Maliýe serişdeleri eýesiniň gözegçiliginde galar we diňe görkezilen möhletden soň yzyna almak üçin elýeterli bolar.
Mundan başga-da, 35 000 dollar möçberinde bir gezeklik administratiw töleg tölenmeli. Taslamanyň maglumatlaryna laýyklykda, wiza ýedi hepde töweregi wagtda resmileşdirilýär. Resminama, adaty döwlet tölegleri tölenen ýagdaýynda, esasy dalaşgäre, onuň aýalyna, çagalaryna we ene-atasyna degişlidir.
Üç ýyllyk steýkingiň dowamynda eýeleri ýylda 3-4% girdeji alyp bilerler, şonda takyk goýumy TON-yň walýuta hümmetine bagly bolup durýar.
Bu maksatnama BAE-de gozgalmaýan emläk ýa-da işewürlik üçin azyndan 540 000 dollar maýa goýumyny talap edýän adaty "altyn wiza" üçin alternatiwa boldy.
"Gozgalmaýan emläk satyn almak ýa-da iň pes girdejini tassyklatmak zerurlygy ýok. Dalaşgärler hyzmaty boýunça berk bäsdeşlik netijesinde saýlanýar" -diýip, TON-yň web sahypasynda aýdylýar .
TON (The Open Network) - bu Telegram habarçysyny esaslandyryjylar doganlar Durowlar tarapyndan 2018-nji ýylda işlenip düzülen Proof-of-Stake blokçeýniniň üçünji neslidir. Soňra ol häzirki wagtda-da bu taslamany goldaýan we ösdürýän TON açyk jemgyýetine geçirildi.
