“Pari Sen-Žermen” fransuz klubunyň futbolçylary Klublaýyn dünýä çempionatynyň dörtden bir finalynda Mýunheniň “Bawariýasyny” utdy. Atlantadaky duşuşyk parižlileriň peýdasyna 2:0 hasabynda tamamlandy.
Oýnuň 78-nji minutynda Dezire Due hasaby açdy. 82-nji minutda “PSŽ” gödek düzgün bozma üçin Wilýam Paço gyzyl duýduryş alandan soň azlykda galdy. Oýna goşulan wagtda tirsek urgusy üçin toparyň ýene bir goragçysy Lukas Ernandes gyzyl duýduryş aldy. Ýöne bu fransuz toparyna hüjüme geçip, ýene bir gol girizmäge päsgel bermedi – Usman Dembele tapawutlandy (90+7).
Ýene bir çärýek final oýnunda Madridiň “Realy” Dortmundyň “Borussiýasyny” 3:2 hasabynda utdy. Oýun Ist-Raterforddaky “Metlaýf” stadionynda geçirildi.
Gonsalo Torres (10-njy minut) bilen Fran Garsiýanyň (20-nji) gollary Madrid toparyna tutuş oýnuň dowamynda artykmaçlygy üpjün etdi, ýöne oýnuň ahyrynda ýagdaý dartgynlaşdy. 90+2-nji minutda Maksimilan Baýer hasapdaky tapawudy azaltdy. Ýene iki minutdan Kilian Mbappe “Real” üçin üçünji goly girizdi, ýöne oýna goşulan wagtyň altynjy minutynda madridliler on bolup galdy – goragçy Din Heýsen meýdançadan çykaryldy. 90+8-nji minutda Seru Girassi penaltiden hasaby 3:2 etdi, ýöne ondan artyk gola nemes klubunyň wagty ýetmedi.
“PSŽ” we “Real” 9-njy iýulda ýarym finalda duşuşar. Bir gün öň finala çykmak üçin Braziliýanyň “Fluminense” topary bilen Angliýanyň “Çelsisi” göreşer.
Klublaýyn dünýä çempionaty ABŞ-da 15-nji iýundan 13-nji iýul aralygynda geçirilýär. Oňa 32 topar gatnaşýar. Ýaryşyň baýrak gaznasy 1 mlrd dollar bolup, ýeňiji 125 mln dollar gazanyp biler.
