Arheologlar Müsüriň gadymy Tanis şäherinden 10 km uzaklykda, Nil deltasynyň golaýynda ýitirilen Imet şäheriniň üstüni açdy. Gazuw-agtaryş işleri Mançester uniwersitetinden Müsüri öwrenýän alym Niki Nilseniň ýolbaşçylygynda geçirildi diýip, Daily Mail habar berýär.
Imetde ilat b.e.öň 1550-nji ýylda ýaşap başlapdyr we ol Gadymy Müsüriň administratiw okruglarynyň biriniň paýtagty bolupdyr. Şäher b.e.öň IV asyrda gülläp ösüpdir – şol döwürde ol möhüm dini we ykdysady merkeze öwrülipdir.
Gazuw-agtaryş işleriniň dowamynda däne ammary, mal agyllary we hudaý-kepjebaş Uajite bagyşlanan desgalaryň harabalyklary tapyldy. Şeýle-de, ilatyň köpelmegi sebäpli gurlan beýik jaýlaryň galyndylary tapyldy – bu Imetiň ösen infrastrukturasynyň bolandygyny delillendirýär.
Köçeleriň birinde aýdym-saz guraly – asman hudaýy Hathoryň şekili bolan sistr tapyldy. Arheologlaryň çaklamasyna görä, ol wagtyň geçmegi bilen ýumrulan jaýlaryň biriniň ýokarky gatynda saklanypdyr.
Ýene bir gyzykly tapyndy merhuma ahyretde ýoldaş bolmak üçin niýetlenen uşebti heýkeljigi boldy. Şeýle heýkeller mazarlara goýlupdyr: olar o dünýäde adamyň deregine işleri ýerine ýetirer diýlip hasaplanypdyr.
Imeti tapmaga uzak aralykdan zond arkaly barlag kömek etdi. Nilsen we onuň Sadat-Siti uniwersitetinden kärdeşleri hemra suratlarynda palçykdan ýasalan binalaryň üýşmegini gördi, bu hem gazuw-agtaryş işlerine itergi berdi.
