Microsoft 9000 töweregi iş ornuny ýa-da işçi güýjüniň 4%-ini azaldar. Bu 2025-nji ýylda işden çykarylyşygyň ikinji tolkunydyr we emeli aňa maýa goýumlaryny artdyrmagyň çäginde kompaniýanyň gurluşyny tertipleşdirmäge we çykdajylary azaltmaga gönükdirilendir.
Gysgaltmalar dürli bölümlere, şol sanda oýun bölümine, dürli derejedäki we dürli sebitlerden bolan işgärlere täsir eder.
"Kompaniýany we onuň toparyny yzygiderli ösýän bazarda oňat orunlarda saklap galmak we üstünlikli hereket etmek üçin zerur guramaçylyk üýtgeşmelerini durmuşa geçirmegi dowam etdirýäris" - diýip, Microsoft-yň wekili Bloomberg-e habar berdi.
2025-nji ýylyň maý aýynda kompaniýa 6000 töweregi adamy, esasanam inženerleri işden aýyrdy. Geçen ýylyň iýun aýynyň ahyryndaky ýagdaý boýunça Microsoft-da 228 müň töweregi adam işleýärdi, şolaryň 45 müňi satuw we marketing bölümlerinde işleýärdi. Adatça üýtgedip gurmak, Microsoft üçin iýun aýynda gutarýan maliýe ýylynyň ahyrynda amala aşyrylýar.
Bloomberg Intelligence-iň seljerijisi Anuraga Rananyň pikirine görä, bu işden çykarmalar AI infrastrukturasyny ösdürmek, dil modellerini öwretmek we maglumat merkezlerini gurmak ýaly çykdajylaryň öwezini dolmaga kömek eder. Şeýle hem, çäreler kompaniýanyň öz AI gurallaryny ulanmaklyga geçýändigini görkezýär.
Üýtgedip gurmagyň çäginde Microsoft-yň global satuwlar boýunça müdiri Jadson Olthoff iýul aýynda iki aýlyk dynç alşa gider. Ol işine sentýabr aýynda çykmaly. Kompaniýa rugsadyň öňünden meýilleşdirilendigini aýtdy.
