Eurojackpot ulgamyndaky tehniki näsazlyk sebäpli Norwegiýanyň onlarça müň ýaşaýjysy millioner bolandyryn öýdüp, emosional tolgunmany başdan geçirdi. Olar Norsk Tipping programmasynda hakyky utuşdan birnäçe müň esse ýokary bolan utuşy gördi.
Munuň sebäbi hem walýuta hasabyndaky ýalňyşlyk boldy: ulgam ýewrony krona öwürmegiň deregine, mukdary ýalňyşlyk bilen 100-e köpeltdi.
Netijede 41 000 töweregi adam birnäçe millionlyk utuş barada nädogry habar aldy. Bu ýalňyşlyk hem oýunçylaryň ynamyna täsir edip, kadr üýtgemelerine getirdi.
2023-nji ýylyň sentýabryndan bäri Norsk Tipping-iň baş direktory wezipesini eýeleýän Tonýe Sagstuen işden çekilýändigini habar berdi. Çözgüt müdirler geňeşiniň gyssagly mejlisinde kabul edildi.
“Ýolbaşçy hökmünde men bolup geçen waka üçin jogapkärçiligimi boýun alýaryn. Biziň toparymyz ýagdaýy düzetmek üçin gije-gündiz işledi, ýöne müşderileriň ynamy düýpli pese gaçdy” – diýip, Sagstuen aýtdy.
Bu eýýäm bir ýylda Norsk Tipping bilen baglanyşykly üçünji waka boldy. Mart aýynda kompaniýa jogapkärli oýun ulgamyndaky düzgün bozulmalar sebäpli 36 mln kron, aprel aýynda lotereýalardaky beýleki ýalňyşlyklar üçin ýene 46 mln kron möçberde jerime töledi.
Ýalňyşlyk sebäpli häzirki Eurojackpot-yň ýeňijisini kesgitlemek başartmady. Şol sebäpli indiki utuşyň baýrak gaznasy rekord 377 mln kron bolar.
Kompaniýada içerki amallary gözden geçirmek we geljekde şeýle ýagdaýlaryň öňüni almak üçin iş topary döredildi.
