Norwegiýaly alty ýaşly mekdep okuwçysy synpdaşlary bilen gezelenç wagty, takmynan, 1300 ýyl bäri ýeriň astynda ýatan wikingler döwrüne degişli gadymy gylyjy tapdy.
Bu tapyndy Brandbu etrabynda ýüze çykaryldy. Henrik Refsnes Mortwedt atly oglanjyk ýerde poslan metal önümini görüp, ony ýerden galdyrdy we mugallymlaryna görkezdi. Mugallymlaryň arheologlara ýüz tutmagy netijesinde, tapylan zadyň wikingler döwrüniň irki tapgyryna degişli bir tarapy ýiti gylyçdygy tassyklanyldy.
Hünärmenleriň aýtmagyna görä, ýarag müň ýyldan gowrak wagtlap ýer astynda galandygyna garamazdan, gowy ýagdaýda saklanypdyr. Häzirki wagtda bu gadymy tapyndy doly öwrenmek üçin Medeni-taryhy muzeýine tabşyryldy.
Barlaglar tamamlanandan soň, gylyjy muzeýe gelýänlere görkezmek meýilleşdirilýär. Arheologlar mugallymlaryň we okuwçynyň dogry hereketleriniň bu tapyndyny saklap galmaga kömek edendigini belledi: olar tapyndyny özbaşdak arassalamaga ýa-da saklamaga synanyşman, ony derrew hünärmenlere berdi.
