Forbes žurnaly karýerasyny özbaşdak guran dünýäniň iň baý 50 zenanynyň sanawyny hödürledi. Sanawa girmek üçin zenanlaryň baýlygy azyndan 2,1 mlrd dollar bolmalydy.
Reýtingde birinji orny Şweýsariýadan 80 ýaşly Rafaela Aponte-Diamant eýeleýär. Onuň baýlygy 38,8 mlrd dollara barabar. Ol adamsy Janluiji Aponte bilen bilelikde dünýäde iň uly gämi gatnadýan kompaniýa bolan Mediterranean Shipping Company-ny (MSC) esaslandyrdy. Bu kompaniýa 136 müňden gowrak işgäri, 900 gämini we 675 ofisi öz içine alýar.
Rafaela ilkinji gämini satyn almak üçin 200 müň dollar möçberde karz aldy. Dokuz ýylyň içinde flot 17 gämä çenli giňeldi. Häzir ol gämileriň interýeriniň dizaýnyna gözegçilik etmegini dowam etdirýär we MSC gaznasynyň müdirler geňeşine girýär.
Ikinji orunda üçek we örtük materiallarynyň iň uly distribýutorlarynyň biri bolan ABC Supply kompaniýasynyň egindeş esaslandyryjysy, amerikaly Daýan Hendriks ýerleşýär.
Üçünji orny Hytaýdan Hansoh Pharmaceuticals farmasewtika kompaniýasyny esaslandyryjy, 64 ýaşly Çžun Hueýszýuan eýeleýär. Onuň kapitaly 15,6 mlrd dollara barabar diýlip hasaplanylýar.
Şeýle-de, sanawda Opra Uinfri ýaly şou-biznesiň tanymal wekilleri hem bar.
Reýtingdäki zenanlaryň aglabasy Aziýa-Ýuwaş umman sebitiniň wekilleridir (24 zenan). Soňra Demirgazyk Amerika (20) we Ýewropa (6) gelýär. Sanawdan 14 zenan tehnologiýa işi bilen baglanyşykly.
Sanawda iň ýaş zenan 38 ýaşly awstraliýaly Melani Perkins boldy. Ol grafiki dizaýn platformasy bolan Canva-nyň esaslandyryjylarynyň biridir.
