25-nji iýunda Aşgabatda Türkmenistanyň bilim ministri bilen Özbegistanyň ýurdumyzdaky ilçisi Rawşanbek Azadbekowiç Alimowyň arasynda duşuşyk geçirildi. Duşuşygyň barşynda bilim we ylym ugurlaryndaky özara hyzmatdaşlygyň häzirki ýagdaýy hem-de geljekki mümkinçilikleri ara alnyp maslahatlaşyldy. Bu barada Bilim ministrliginiň metbugat gullugy habar berýär.
Duşuşygyň barşynda ikitaraplaýyn hyzmatdaşlygyň netijeli mysaly hökmünde, Daşkentiň irrigasiýa we oba hojalygyň mehanizasiýasynyň inženerleri institutynyň 17 agzadan ybarat wekiliýetiniň okuw-tejribe maksatly häzirki wagtda dowam edýän Türkmenistana sapary görkezildi. Bu on günlük saparyň dowamynda özbek talyplary we mugallymlary ýurdumyzyň agrosenagat toplumynda tejribe geçerler.
Şeýle hem 2025-nji ýylyň iýul aýynda S.A.Nyýazow adyndaky Türkmen oba hojalyk uniwersitetiniň wekiliýetiniň Özbegistana okuw-tejribe saparyna iberilmeginiň meýilleşdirilýändigi aýratyn nygtaldy.
Duşuşykda taraplar hyzmatdaşlygyň geljekki ugurlaryny hem kesgitlediler.
Hususan-da, iki ýurduň mekdep okuwçylarynyň we talyplarynyň halkara olimpiadalaryna gatnaşmagy bilen bagly meseleler hem agzaldy. Türkmen tarapy 2025-nji ýylyň aprelinde Aşgabatda mekdep okuwçylarynyň arasynda geçirilen halkara matematika olimpiadasynda 17 medal gazanan Özbegistanyň toparynyň üstünlikli çykyşyny kanagatlanma bilen belledi.
Öz gezeginde, özbek tarapy Türkmenistanyň bilim ulgamyndaky dolandyryş tejribesine, sanly menejment ulgamlaryna gyzyklanma bildirdi. Şeýle hem döwlet we hususy ýokary okuw mekdepleriniň arasynda hyzmatdaşlygy güýçlendirmek we Türkmenistanda Özbegistanyň ýokary okuw mekdepleriniň gatnaşmagynda sergi – “Uniwersitetleriň ýarmarkasyny” guramaklygy teklip etdi. Bu başlangyç bilim ulgamynda täze hyzmatdaşlyk mümkinçilikleriniň döremegine itergi berjekdigine ynam bildirdi.
Duşuşygyň ahyrynda türkmen tarapy Özbegistanyň bilim we ylmy jemgyýetçiliginiň wekillerini 2025-nji ýylyň oktýabr aýynda Aşgabat şäherinde geçiriljek «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara ylmy maslahata we sergä gatnaşmaga çagyrdy.
