SS Innovations International kompaniýasy Amerikada ilkinji gezek kardiohirurgiýa üçin SSi Mantra 3 robotizirlenen ulgamynyň ulanylandygyny habar berdi. Operasiýa 2025-nji ýylyň 8-nji iýunynda Guaýakildäki (Ekwador) Interhospital hassahanasynda geçdi.
Hirurg Huan Suniga gan aýlanyşygy bilen bagly näsazlyklary döredip biljek dogabitdi nogsanlyk bolan ýüregiň ýokarky kameralarynyň arasyndaky deşigi ýapmak boýunça operasiýa geçirdi. Ol Demirgazyk we Günorta Amerikada bu ugurda SSi Mantra 3 ulgamyny ulanan ilkinji hirurg boldy.
“Latyn Amerikasynda robotizirlenen hirurgiýada SSi Mantra üstünlikli ulanylandan soň, biz bu ösen ulgamy çylşyrymly ugurlarda, aýratynam, kardiohirurgiýada ulanmagy makul bildik. Ulgam edarada tassyklandy we ehokardiografiýa tarapyndan tassyklanan täsirli netijäni berdi. Hassa üstünlikli dikelýär” – diýip, doktor Suniga belledi.
Interhospital Günorta Amerikada SSi Mantra ulgamy ornaşdyrylan ilkinji hassahanadyr. Ol çylşyrymly hirurgiýa gatyşyklary üçin ulanylýar. Kesigiň mümkin boldugyndan kiçi bolmagy gan ýitgisini azaltmaga, dikeldişi çaltlandyrmaga we operasiýanyň takyklygyny ýokarlandyrmaga kömek edýär.
SSi Mantra 3 ulgamy 3-5 robotizirlenen eller, ykjam dolandyryş merkezi, 4K 3D-monitory we organlaryň 3D modellerini hakyky lukmançylyk suratlary bilen “utgaşdyrmak” funksiýasy bilen üpjün edildi.
Aprel aýynda SS Innovations kompaniýasy SSi Mantra-nyň kömegi bilen 100-den gowrak görnüşli 4000 operasiýa, şol sanda 215 sany ýürek operasiýasynyň geçirilendigini we olaryň gaýra üzülme, şikes ýa-da ölüm ýagdaýy bolmazdan geçendigini habar berdi. Käbir operasiýalar Hindistanda uzak aralykdan dolandyrmak arkaly geçirildi.
