Amerikanyň Florida ştatynda lukmanlar göwrelilik döwründe çaganyň bedeninde örän seýrek duş gelýän operasiýany amala aşyrdylar.
Göwreliligiň 25-nji hepdesinde hirurglar ýatgydaky çagany bölekleýin çykaryp, oňa dem alyş ýollaryny açdylar we soňra ony yzyna ýerleşdirdiler. Bu barada The Guardian neşiri habar berýär.
Keýşera we Greg Žuberler göwreliligiň 19-njy hepdesinde çagada uly gaýra üzülmäniň bardygyny bildiler. Göwredäki çagada ýokary dem alyş ýollarynyň dogabitdi dykylma sindromy (obstruksiýa) kesel kesgidi goýuldy. Bu seýrek ýagdaýda galyň membrana çaganyň dem alyş ýollaryny bekleýär we netijede öýkenlerde suwuklyk ýygnanýar.
Bu sindrom her 50 müň çagadan birinde duş gelýär we köplenç ölüm bilen tamamlanýar. Bejerýän lukman Emanuel Wlastos özüniň 42 ýyllyk tejribesinde şular ýaly diňe on töweregi waka bilen ýüzbe-ýüz bolandygyny we diňe üç çaganyň halas edilendigini aýtdy.
Ilki bilen lazer endoskopy arkaly ýatgynyň içinde operasiýa geçirmeklik bellenildi, ýöne bu synanyşyk netije bermedi. Şondan soňra lukmanlar has çylşyrymly usula başlamak kararyna geldiler.
Operasiýa 2025-nji ýylyň iýun aýynda Orlando lukmançylyk merkeziniň ýanyndaky Winni Palmer hassahanasynda geçirildi. Kesar kesimi arkaly çaga ýatgydan bölekleýin çykaryldy. Soňra gulak-burun-bokurdak hünärmeni hirurgiki ýol bilen oglanjyga dem alyş ýollaryny ýasady. Şondan soň çaga ýatga yzyna goýuldy we ýatgy gaýtadan tikildi.
Alty hepde geçenden soň, aýalyň çaga dogrumy başlady. Kassian atly oglanjyk takmynan 1,4 kg agramy bilen dünýä indi we dört aýdan gowrak wagtlap reanimasiýada ýatdy. Dekabr aýynyň ahyrynda çaga öýüne goýberildi.
Geljekde Kassian ýene birnäçe operasiýany geçirmeli bolar. Häzirki wagtda ol heniz hem emeli dem beriş enjamyna mätäçlik çekýär.
Meňzeş waka geçen ýyl 23 ýaşly britaniýaly Liza Koffiniň başyndan hem geçipdi. Göwrelilik döwründe onuň oglunda oňurga ýetmezçiligi anyklanypdy. Çaga kömek etmek üçin 27-nji hepdede ol wagtlaýynça ýatgydan çykarylyp, oňurgasy bejerildi we yzyna goýuldy.
Luka diňe 38-nji hepdede dünýä indi. Hassahanadaky gysga dikeldişden soň, ol öýüne goýberildi. Operasiýanyň şowly geçendigine garamazdan, çagada beýni patologiýasy (Arnold-Kiari sindromy) anyklandy. Lukmanlar onuň geljekde özbaşdak ýöräp biljekdigine şübheli garaýarlar.
