Morgan Stanley analitikleriniň hasaplamalaryna görä, Hytaýyň robototehnika bazary 2023-nji ýyldaky 47 mlrd dollardan 2028-nji ýyla çenli 108 mlrd dollara çenli ýokarlanar. Ortaça ýyllyk ösüş 23% bolar. Geçen ýyl Hytaý dünýäniň robototehnika bazarynyň eýýäm 40%-ini eýeledi diýip, South China Morning Post habar berýär.
Pudagyň ösüşine hem bazara gatnaşyjy kompaniýalaryň tagallalary, hem Hytaý hökümetiniň goldawy ýardam berer. Ýakyn ýyllarda Hytaýda ulanylýan robotlar diňe bir awtomatizirleme ugruna däl, eýsem umumy jemgyýete-de täsirini ýetirer.
Resmi statistikanyň maglumatlaryna görä, maý aýynda senagat robotlarynyň önümçiligi geçen ýyl bilen deňeşdirilende 35,5% ýokarlanyp, 69 056 birlik boldy. Hyzmat robotlarynyň önümçiligi 13,8% ýokarlanyp, 1,2 mln birlige ýetdi. Bulara, hususan-da, robot-tozan sorujylar, aýna ýuwujylar we harytlary eltip bermek üçin enjamlar degişlidir.
Hytaý dünýäde öndürilýän ähli senagat robotlarynyň ýarysyndan gowragyny sarp edýär. Ýurtda (şol sanda Gonkongda) robototehnika bilen baglanyşykly 741 700 kompaniýa hasaba alyndy.
Morgan Stanley-iň çaklamalaryna görä, 2028-nji ýyla çenli diňe Hytaýda dron önümçiligi 40 mlrd dollara ýeter – bu 2024-nji ýyldaky derejeden iki esse ýokarydyr. Adam şekilli robotlaryň bazary ýylda 63% ýokarlanar: 2024-nji ýyldaky 300 mln dollardan 2030-njy ýylda 3,4 mlrd dollara çenli. Şol wagt ýurtda 252 000 töweregi gumanoid robot ulanylar. Asyryň ortalaryna çenli olaryň sany 302 mln birlige ýetip biler, bu bolsa dünýädäki robotlaryň 30%-ine deň bolar.
