Microsoft kompaniýasy emeli aň tehnologiýalaryna çykdajylaryň artmagy sebäpli müňlerçe iş ornuny azaltmagy meýilleşdirýär. EA-nyň ýaýramagy sebäpli işgärleri azaltmak barada Amazon kompaniýasy hem habar berdi.
Bloomberg-iň çeşmelere salgylanyp ýazmagyna görä, Microsoft-da işden çykarmalaryň uly bölegi satuw bölümleriniň işgärlerine täsir eder.
Agentligiň söhbetdeşleriniň aýtmagyna görä, işden çykarmak barada maliýe ýyly tamamlanandan soň, iýul aýynyň başynda yglan ediler. Şol bir wagtyň özünde, diňe bir satuw däl-de, beýleki bölümlerden hem işgärler işden çykarylyp bilner.
Maý aýynda kompaniýa 6000-den gowrak işgärini işden aýyrdy. Olar müşderiler bilen işlemek boýunça bölümçelere, şol sanda satuw we marketing bölümlerine degişlidi. Mundan öň aprel aýynda Microsoft işgärlere kiçi we orta kärhanalar üçin programma üpjünçiliginiň satuwynyň esasy bölegini başga potratçylara geçirmek meýilnamalary barada duýdurdy. 2024-nji ýylyň iýun aýynyň ahyryna çenli ýagdaýa görä, kompaniýada 228 müň adam işleýärdi, şolardan 45 müňüsi – satuw we marketing bölümlerinde.
Ýolbaşçylyk serwerlere we maglumat merkezlerine uly maýa goýumlar sebäpli, maýadarlara we işgärlere käbir ugurlarda çykdajylary tygşytlamagyň zerurdygy barada aýtdy.
Öz gezeginde Amazon-yň baş direktory Endi Jassi işgärlere EA bilen dostlaşmaga taýýar adamlaryň iş orunlaryny saklamak mümkinçiliginiň bardygyny aýtdy.
2022-nji ýyldan bäri Amazon 27 müňden gowrak işgärini azaltdy. Esasy işgär ýitgileri gurluşlary öndürmek, hyzmat hödürlemek we kitap boýunça bölümçelere täsir etdi. Amazon EA-nyň ulanylmagyny göz öňünde tutýan 1000-den gowrak hyzmaty we programmalary işläp taýýarlaýar ýa-da eýýäm işe girizdi, ýöne munuň geljekde durmuşa geçiriljek işleriň diňe ujypsyz bölegidigi aýdylýar.
