17-nji iýunda Brýusselde (Belgiýa) Türkmenistan bilen Ýewropa Bileleşiginiň arasynda adam hukuklary boýunça dialogyň 17-nji mejlisi geçirildi. Bu barada Türkmenistanyň DIM-nde habar berdiler.
Mejlisiň çäginde adam hukuklary babatynda hereketleriň milli meýilnamalarynyň durmuşa geçirilmegini, hukugyň hökmürowanlygyny berkitmegi, gender deňligini üpjün etmegi we halkara düzümlerde hyzmatdaşlygy öz içine meseleleriň giň toplumy boýunça pikir alyşmalar geçirildi.
Duşuşykda türkmen wekiliýetine daşary işler ministriniň orunbasary Ahmet Gurbanow ýolbaşçylyk etdi. Wekiliýetiň düzümine Türkmenistanyň Adalatçysy, Bilim ministriniň orunbasary, şeýle hem Ýokary Kazyýetiň, Zähmet we ilaty durmuş taýdan goramak, Içeri işler, Adalat ministrlikleriniň we Döwlet, hukuk we demokratiýa institutynyň wekilleri girdi.
Dialogyň dowamynda türkmen tarapy Türkmenistanda adam hukuklary boýunça 2021-2025-nji ýyllar üçin Hereketleriň milli meýilnamasynyň durmuşa geçirilmegini, şol sanda Adalatçynyň diwanynyň işini we kazyýet özgertmeleriniň çägindäki başlangyçlary öz içine alýan yzygiderli alnyp barylýan işler bilen tanyşdyrdy.
Ara alyp maslahatlaşmalarda Türkmenistanyň halkara guramalary, hususan-da BMG, ÝHHG hem-de beýleki ýöriteleşdirilen düzümler bilen adam hukuklaryny ilerletmek we goramak meselelerinde hyzmatdaşlygyna aýratyn orun degişli edildi. Türkmenistanyň konstruktiw halkara dialoga açyklygy hem-de özara hormat goýmak we deňhukuklylyk ýörelgeleri esasynda bu ugurdaky hyzmatdaşlygy giňeltmäge ygrarlylygy nygtaldy.
Dialogyň netijeleri boýunça taraplar yzygiderli geňeşmeler tejribesini dowam etdirmäge taýýardyklaryny tassykladylar, şeýle hem hyzmatdaşlyk we özara düşünişmek ruhunda mundan beýläk hem özara gatnaşyklaryň anyk ädimleri boýunça ylalaşdylar.
