Sosial ulgamlar esasy habar çeşmesi hökmünde telewideniýeden, gazetlerden, habar saýtlaryndan we beýleki adaty köpçülikleýin habar beriş serişdelerinden öňe geçýär. Bu barada Oksford uniwersitetiniň Reuters Institute for the Study of Journalism merkeziniň täze hasabatynda aýdylýar.
Gözlegiň awtorlary dünýä ilatynyň ýarysyndan gowragyny jemleýän 48 ýurtda tas 100 müň adam bilen pikir soraşma geçirdi.
Onuň netijesinde diňe ABŞ-da uly ýaşly adamlaryň 54%-iniň habarlary sosial ulgamlaryň we wideo platformalaryň üsti bilen kabul edýändigi anyklandy. Deňeşdirmek üçin, pikir soraşma gatnaşanlaryň 50%-i habarlary telewizordan görýär, 48%-i habar saýtlaryny we programmalary ulanýar – 2013-nji ýylda bu görkezijiler, degişlilikde, 27%, 72% we 69% bolupdy.
Täzeliklerden habarly bolmak üçin iň meşhur sosial ulgam Facebook bolmagynda galýar – ony hasabata giren 48 ýurtdan ulanyjylaryň 36%-i agzady. Onuň yzyndan YouTube (30%), Instagram we WhatsApp (hersi 19%), TikTok (16%) we X (12%) gelýär. Soňky bir ýylda iň çalt ösen sosial ulgam TikTok boldy – onuň habar bilen üpjün ediji hökmünde meşhurlygy 4% ýokarlandy.
Bellenilişi ýaly, sosial ulgamlary ulanyjylar, köplenç, habarlary okamaýar-da, görýär. Habar wideosynyň gündelik sarp edilişi 2021-nji ýyldaky 55%-den 2025-nji ýylda 72%-e çenli ýokarlandy. Hususan-da, habarlar TikTok-da we ýaşlaryň arasynda meşhur bolan beýleki programmalarda işjeň görülýär.
Habar kontentinden gaçýan ulanyjylaryň paýy geçen ýyldan bäri 1 göterim punkt ýokarlanyp, 40%-e ýetdi. Bu habarlaryň ulanyjylary gaýgylandyrýandygy ýa-ha olaryň aşa köp bolmagynyň ýürege düşýändigi, ýa-da olara uruşlar we dawalar barada aşa köp habaryň duşýandygy bilen baglanyşykly boldy.
Gözleg sosial ulgamlaryň adaty KHBS-iň doly elýeterli bolmadyk auditoriýasyny: ýaşlary, sagçylary goldaýan adamlary we nusgawy žurnalistika ynanmaýanlary özüne çekýändigini görkezýär.
18 – 24 ýaş aralygyndaky adamlaryň arasynda habarlaryň esasy formaty audio we wideo boldy. Bu tendensiýany göz öňünde tutup, adaty neşirçiler YouTube we TikTok ýaly platformalarda kontenti wideo görnüşine geçirmäge çalyşýar.
Smartfonlar habarlary kabul etmek üçin esasy gurluş bolmagynda galýar. Pikir soraşma gatnaşan 35 ýaşdan kiçi adamlaryň 57%-i irdenini telefondaky habarlar bilen başlaýar.
Şeýle-de, ABŞ-da podkastlaryň meşhurlygy boýunça çap gazetleriniň we radionyň yzyndan ýetendigi belli boldy.
