Forbes dünýäniň 50 sany iň köp girdeji gazanan we abraýly blogerleriniň ýyllyk sanawyny hödürledi. Sanawda öňdebaryjy yzygider dördünji ýyl MrBeast (hakyky ady Jimmi Donaldson) bolmagynda galýar. Neşir onuň girdejisini 85 mln dollar diýip hasaplady, onuň akkauntlaryny yzarlaýjylaryň umumy sany bolsa 634 mln adama barabar.
Ikinji orny bloger, telekeçi we kinoprodýuser Dhar Mann eýeledi. Ol 56 mln dollar gazandy, onuň auditoriýasy 137 mln adama ýetýär. Üçlügi inflýuenser we professional boksçy Jeýk Pol jemleýär. Onuň girdejisi 50 mln dollar, yzarlaýjylarynyň sany – 79 mln. Noýabr aýynda Poluň Maýk Taýson bilen geçiren söweşi jemgyýetde uly gyzyklanma döretdi.
Şeýle-de, sanawa TikTok-yň täze ýyldyzlary – Aliks Erl, Jeýk Şeýn, Nara Smit girdi. Bulardan başga-da, “Call Her Daddy” podkastyny alypbaryjy Aleks Kuper, YouTube blogeri Ms. Rachel, aýdymçy we tansçy Eddison Reý hem-de komikler Druski we Adam W bar.
Reýtinge täze goşulanlaryň arasynda dijeý we TikTok blogeri Xandra, hukukçy we şahsy maliýe hünärmeni Erika Kullberg hem-de model Wisdom Kaye bar.
Şu ýyl Forbes-iň sanawyndaky 50 blogeriň umumy girdejisi tas 853 mln dollar boldy – bu 2024-nji ýyldakydan 18,5% köpdür. Ähli gatnaşyjylaryň umumy auditoriýasy 3,37 mlrd adama ýetýär, bu hem geçen ýyl bilen deňeşdirilende 25% köpdür.
Reýting düzülende Forbes üç ölçegi göz öňünde tutdy: girdeji, telekeçi işjeňligi we abraýy (ululygy we adamlary özüne çekmegi).
