Hytaýly alymlar doňuz düwünçekleriniň içinde kiçijik adam ýürekleriniň ösdürilendigini habar berdiler. Bu baradaky maglumatlar sütün öýjükleriniň barlagy boýunça halkara jemgyýetiniň mejlisinde hödürlendi diýip, Nature žurnaly ýazýar.
Synag üçin alymlar adam we haýwan genlerini birleşdirýän himer düwünçeklerini döretdiler. Bu usul adam organlaryny transplantasiýa etmek üçin oňaýly haýwanlarda ösdürmäge mümkinçilik berýär. Hünärmenleriň bellemegine görä, şeýle barlaglar donor organlarynyň ýetmezçiligi bilen baglanyşykly meselelere çözgüt bolup biler.
Taslamanyň ýolbaşçysy, Hytaýyň Ylymlar akademiýasynyň wekili Laý Lýansýueniň düşündirişine görä, doňuzlar olaryň organlarynyň anatomiki taýdan adamyňkylara meňzeşligi sebäpli saýlanyp alyndy. Onuň topary mundan öň hem doňuz düwünçeklerinde bir aýa çenli ýaşap bilýän adam böwreklerini ösdüripdi.
Täze geçirilen synag üç tapgyrdan ybarat. Ilki bilen, doňuz düwünçeginde ýürek ösmegini üpjün edýän genler öçürilýär. Soňra düwünçege adamyň ýörite üýtgedilen we ösüp bilýän sütün öýjükleri sanjylýar. Gibrid düwünçejik 12 öýjükli morula tapgyryna ýeteninde, onuň ösüşi dowam etdirilmegi üçin surrogat doňzuň ýatgysyna ýerleşdirilýär.
Netijede, adam öýjükleri ýok bolmadyk ýagdaýynda ýürek emele gelýär. Bu barlagda adam ýürekli himer düwünçekleri 21 gün ösdi.
Barlaglar tehnologiýanyň geljegi bardygyny görkezse-de, olaryň gözegçilik döwri entek gysga. Mundan başga-da, onuň ahlak taýdan täsirleri halkara derejesinde giňden ara alnyp maslahatlaşylmagyny talap edýär.
