Warner Bros. Discovery amerikan korporasiýasy iki garaşsyz jemgyýetçilik kompaniýasyna bölünýändigini habar berdi. Korporasiýanyň beýanynda bu çözgüdiň her bir iş ugrunyň mümkinçiliklerini doly açyp görkezmäge gönükdirilendigi aýdylýar.
Täze kompaniýalaryň ilkinjisi akym platformalaryny we kinostudiýalary öz içine alar. Onuň düzümine Warner Bros. Television, Warner Bros. Motion Picture Group, DC Studios, şeýle-de HBO we HBO Max girer.
Ikinji kompaniýa telewizion brendleri dolandyrar. Oňa CNN, TNT Sports (ABŞ), Discovery, Ýewropadaky ýaýlym kanallary, şeýle-de Discovery+ we Bleacher Report (B/R) girizildi.
Mundan başga-da, Warner Bros. 17,5 mlrd dollar möçberde karz puluny alandygyny mälim etdi. Bu serişdeler bölünme tamamlanýança gaýtadan kapitallaşdyrylar diýlip garaşylýar.
Warner Bros. Discovery 2022-nji ýylda AT&T-den Warner Media bölünip aýrylandan we Discovery Inc. bilen birleşenden soň döredildi. 2023-nji ýylyň ahyrynda kompaniýa Paramount Global bilen birleşmek barada gepleşik geçirdi, ýöne 2024-nji ýylyň fewral aýynda şertnamadan ýüz öwürdi.
