4-nji iýunda Türkmenistan 2026–2028-nji ýyllar üçin Birleşen Milletler Guramasynyň Ykdysady we Durmuş Geňeşiniň (ECOSOC) agzalygyna saýlandy. Bu barada Türkmenistanyň Daşary işler ministrliginiň hem-de guramanyň resmi saýtynda habar berildi. Ses berişlik BMG-niň Baş Assambleýasynyň 79-njy sessiýasynyň 75-nji plenar mejlisinde geçirildi.
ECOSOC BMG-niň durnukly ösüş we ykdysady meseleler boýunça işini hem-de degişli düzümleriniň hereketlerini utgaşdyrýan esasy edarasy bolup durýar. Geňeş ösüş ugrunda halkara gün tertibini öňe sürmekde, ykdysady, durmuş we ekologik ugurlarda hyzmatdaşlygy berkitmekde möhüm orny eýeleýär.
Geňeşiň düzümine 3 ýyllyk möhlet bilen saýlanylýan 54 agza döwlet girýär. Her ýyl gizlin ses bermek arkaly ygtyýarlyk möhleti tamamlanan ýurtlaryň ýerine sebit toparlaryndan 18 ýurt saýlanýar.
Täze saýlanan ýurtlar 2026-njy ýylyň 1-nji ýanwaryndan başlap ECOSOC-nyň düzümine girerler.
Türkmenistan mundan ozal hem 2013–2015 we 2019–2021-nji ýyllar aralygynda ECOSOC-nyň agzasy bolupdy.
