Nvidia bazar bahasy boýunça ýene-de dünýäniň iň uly kompaniýasy boldy. Şu hepde onuň bazar bahasy 3,45 trln dollara ýetdi we netijede Microsoft-dan öňe geçdi.
CNBC-niň habar bermegine görä, Microsoft söwda sessiýasyny 3,44 trln dollar görkeziji bilen ýapdy. Tapawut uly däl, ýöne tehniki taýdan Nvidia indi dünýäniň iň gymmat jemgyýetçilik kompaniýasy hasaplanýar.
Soňky gezek Nvidia bu orny şu ýylyň 24-nji ýanwarynda eýeledi. Düýnki söwda sessiýasynyň jemi boýunça, onuň bazar bahasy tas 3% ýokarlandy. Soňky bir aýda ösüş, takmynan, 25% boldy.
Nvidia geçen ýylyň iýun aýyndan bäri bazar bahasy boýunça Apple we Microsoft bilen öňdebaryjylyk ugrunda yzygiderli bäsleşýär.
Nvidia-nyň paýnamalarynyň ösüşi ýarymgeçirijileri öndürýän kompaniýalaryň bazaryndaky umumy ösüş bilen gabat geldi. Micron Technology-nyň paýnamalary 4%, Broadcom-yň kagyzlary bolsa ulgam çözgütleri üçin täze çip hödürländen soň 3% ýokarlandy.
Geçen hepde Nvidia birinji maliýe çärýeginiň netijelerini hödürledi. Hasabat üstünlikli boldy we analitikleriň belleýşi ýaly, soňky günlerde kompaniýanyň paýnamalarynyň bahasynyň ösmegine täsir eden şertleriň biri boldy.
