Finlýandiýanyň Kotka şäherinde ýerli hökümet Senaatti-kiinteistöt döwlet kompaniýasyndan gadymy Kýuminlinna (Kýumenegorod) galasyny satyn aldy. Şertnamanyň bahasy simwoliki 1 ýewro boldy. Öňki eýesi çykdajysynyň aşa köpdügi sebäpli emlägi saklamakdan ýüz öwürdi diýip, RBK ýazýar.
Gala 1792–1793-nji ýyllarda rus serkerdesi Aleksandr Suworowyň buýrugy bilen gurlupdyr. Ol Russiýanyň şol wagtky serhedinde ýerleşip, 200 ýyl töweregi harby maksatlar üçin ulanylypdyr. Gala, takmynan, 20 ýyl ozal ýapylypdy. Onuň 50 gektar töweregi meýdanynda, takmynan, 20 bina ýerleşýär, olaryň iň ulusy serkerdeleriň binasy we kazarmasydyr.
Täze eýeleri galany dikeltmegi we muzeý hem-de syýahatçylyk maksady bilen ulanmagy meýilleşdirýärler. Birinji tapgyrda içine diňe syýahat ýolbeledi bilen girip bolar. Soňlugy bilen bu ýerde ýol görkezijiler, ýodalar, kafeler we konsert meýdançalary peýda bolar. Maksat - gala baryp görmekligi muzdsuz etmekdir.
Öňki eýesi emlägi saklamak üçin ýylda 200 000 ýewro sarp edýän eken. “Kýuminlinna galasynyň dostlary” birleşigi galany dikeltmek üçin hökümetden eýýäm 100 000 ýewro aldy, ýene 20 000 ýewro tebigat ugruny döretmäge gönükdiriler. Galan serişdeler şäher býujetinden bölünip berler. Maliýe ministrliginiň hasaplamalaryna görä, ähli işler, takmynan, 18 million ýewro düşer.
Kotka şäheri Wyborg bilen Helsinkiniň arasynda, hersinden takmynan 100 km uzaklykda ýerleşýär.
