Finlýandiýa ýaşaýjylaryň bagtly bolmagynyň derejesine esaslanýan ýurtlaryň täzelenen reýtinginde yzygider sekizinji gezek birinji orny eýeledi. Bu BMG-niň tabşyrygy boýunça hünärmenler topary tarapyndan taýýarlanýan Bütindünýä bagt hasabatyndan gelip çykýar.
Reýtingde Finlýandiýa 7,736 bal gazandy. Şeýle-de, ilkinji bäşlige geçen ýyl bolşy ýaly Demirgazyk Ýewropa ýurtlary – Daniýa, Islandiýa, Şwesiýa hem-de Niderlandlar girdi. Sanawyň yzyny Kosta-Rika, Norwegiýa, Ysraýyl, Lýuksemburg we Meksika dowam etdirdi.
Sanawda ABŞ 23-nji orundan 24-nji orna düşdi, bu hem ýurt üçin iň ýaramaz görkeziji boldy. Hytaý geçen ýylky reýtingdäki 60-njy orny bilen deňeşdirilende, 68-nji orny eýeledi. Sanawyň iň soňky ornunda ýene-de Owganystan ýerleşdi. Ylmy gözlegçileriň belleýşi ýaly, Owganystanda ortaça durmuş baly 1,364 bolup, bu Bütindünýä bagt hasabatynda häzire çenli iň pes ortaça görkezijidir. Reýtingde Owganystandan öňde Sýerra-Leone, Liwan, Malawi we Zimbabwe ýerleşýär.
World Happpiness Report reýtingi düzülende jan başyna düşýän JIÖ, saglygy goraýşyň hili (raýatlaryň ömür dowamlylygy), erkinlik we howpsuzlyk derejesi, şeýle-de ilatyň döwlete we alnyp barylýan syýasata bolan ynam derejesi göz öňünde tutulýar.
Şeýle-de, bagt indeksi dürli ýurtlardan ýaşaýjylaryň arasynda özlerini bagtly duýmak duýgulary barada geçirilen pikir soraşmanyň netijelerini öz içine alýar. Bu maglumatlar Gellap halkara gözleg merkeziniň kömegi bilen ýygnalýar. Reýting 20-nji martda bellenilýän Halkara bagt gününde neşir edilýär.
